平價車 ： 新賽歐

新賽歐係我租車中比較唔鐘意既一部

呢部雖然係美國牌子，內裡應該都係一部韓國車。呢部低配車只得個1.2引擎，但係馬力都算可以（對1.2黎講），不過油門就真係要踩大d。

低配置跟鐵鈴

好膠的軚盤，摸落去仲膠！

幾簡單既顯示

低配置齋收音機，無CD，有Aux in

泠氣中等，唔夠日本車勁

煙插

儲物盤幾大，夠嗮裝我d“攞你命3000”

好膠的波棍

左邊出風口下低有個格放錢/高速卡

更正，原來有兩個格！

後坐唔逼，唔頂腳

後邊窗係手搞，我個人喜歡

前面窗控制係中間，學Benz咩

低配置車有乘客Airbag！

門邊儲物格好窄，屈臣氏水放唔落

好似Civic咁，超粗A柱高到睇位幾難

Pros&Cons：

強項：

• 車廂俾同級車大，坐食個大人都無問題。
• 內籠儲物地方多。
• 後座手攪窗，小野壞。

弱點：

• 內籠膠感突出。
• 1.2引擎有時唔夠力。
• 粗A柱，盲位多。
• 避震偏硬，行爛路會好唔舒服。

平價車 ： 新愛麗舍

我之前係北京之行都有大概講過呢部車。呢部車亦都係我租得最多，同我最鐘意租到既車。

以同級車比較，呢部車係最好力既一部，因為其他車都係1.2/1.4/1.5等，呢部就係1.6。低轉扭力高，起步同靈活度亦都較好。不過最吸引人既地方係操控，呢部車套避震可以吸收大陸多數爛路既震動，但係同時間又可以俾到我信心行好多灣既山路。有次揸住呢部車半夜行井岡山，令人回味！

油耗來講，雖然做唔到好似飛度咁平，不過都係大概五毫子一公里（約￥7.3/公升 ），1.6車都算唔錯。

本來我都以為法國車耐用性有限，點知有一次，又江西經過湖南行百幾公里105國道去韶關過夜，點知成條國道掘到爛嗮，卒之被迫行咗成六個鐘rally先可以脫離險境（中間仲見到部大陸四驅車福迪成個轆跌咗出黎），我部車依然乜事都無，之後我對呢部車真係五體投地！

唯一要投訴既地方，係部車張凳。上背支持比較差，如果揸過個零鐘就會腰酸背疼。

以上係最低型號既鐵鈴

後座比較窄 ，如果有四個大人會坐得辛苦d。

中控台簡單，好容易操作。

車尾都算大，裝到四個行李艙行李。

Pros&Cons：

強項：

• 引擎好力，操控靈活。
• 避震適合大陸路況，坐得舒服。
• 操作簡單，好小野壞。
• 比我想像中耐用。

弱點：

• 內籠窄，唔建議坐四個大人。
• 唔好租自動波，個四前速好失敗。
• 駕駛凳設計有問題，揸長車會辛苦。
• 喇叭掣係指揮燈度，緊急環境時會噤錯掣。

平價車： 飛度

我歷黎租咗兩架飛度，一架係比較舊，一架係全新既。講真兩部大同小異，只係新果部既避震硬d，同未開既逼力係差d（雖然呢一代Honda既原廠逼力都係好唔掂）。 以下係我先前租既一部（舊車）：

內籠：

部車只係行咗3564公里

當日平均油耗係5.8l/100km，同級黎講真係好低！

收音機比較簡單，不過有空間自己升級

以租車黎講，呢部車多數都係自動波車，棍波 屬好小數。

Pros & Cons

好處：

• 部車真係好慳油，d法國車（愛麗舍,207)平均油耗通常都要超過 6l/100km，五前速自動波行120公里都唔過2500轉。
• i-Vtec 系統行高速最有效，過110km/h 部車仲好有力
• 隔音真係唔錯，比之前我租部Civic仲要好
• 泠氣ok凍，34度天氣都算夠涼
• 前後坐空間夠大，坐4個大人都ok
• 好多地方放野

弱點：

• 避震較硬，唔坐得車既人可能連行高速都頂唔順。但係過灣果陣部車就好側，操控唔夠法國對手黎
• 100km/h之內加速欠佳，未開 i-vtec 之前好慢
• 車頭尖，好難睇位
• 逼力唔夠，落雨揸會驚驚
• 套包圍雖然靚，不過係大陸有d過低，鄉村爛路要好慢咁過

總結：

如果你係想行高速比較多既路程，呢部車會係好好既選擇。但係如果山路多，不如租番d法國車好過。